उपभोक्ता अधिकार संरक्षण गर्ने जिम्मेवारी पाएको वाणिज्य आपूर्ति तथा उपभोक्ता संरक्षण विभागले व्यावसायिक क्रियाकलापलाई स्वच्छ, पारदर्शी र प्रतिस्पर्धी बनाउन सदैव क्रियाशील रहेको जनाएको छ ।
शुक्रबार यहाँ आयोजित कार्यक्रममा विभागका महानिर्देशक प्रकाश पौडेलले दैनिक बजार अनुगमनलाई निरन्तरता दिइएको बताउनुभयो । “दिनमा तीन÷चार टोलीलाई बजार अनुगमनमा खटाएका छौँ । विभागको क्षमताअनुसार हामीले बजारलाई व्यवस्थित बनाउने कोशिस गरिरहेका छौँ”, विभागका पर्याप्त जनशक्ति नहुँदा अनुगमनलाई व्यापक बनाउन नसकिएको उहाँको गुनासो थियो ।
सुशासन र बजार अनुगमनलाई प्रभावकारी बनाउन अधिकारकर्मी, सचेत उपभोक्ता र सम्बन्धित निकायबीच सहकार्यको आवश्यकता रहेको उहाँको भनाइ थियो । अपराध अनुसन्धान महाशाखाका प्रहरी उपरीक्षक कृष्णप्रसाद कोइरालाले वाणिज्य विभाग र जिल्ला प्रशासन कार्यालयसँग समन्वय गरेर कानूनविपरीत कालोबजारी गर्ने निकायलाई कानूनको दायरामा ल्याउने प्रतिबद्धता व्यक्त गर्नुभयो ।
पत्रकार सागर पण्डितले चाडबाडका बेलामात्र बजार अनुगमन गर्ने प्रवृत्ति अन्य गर्नुपर्नेमा जोड दिँदै दशैँतिहारमा मात्र प्रशस्त अनुगमन हुने तर अरु बेला किन नहुने भनी प्रश्न उठाउनुभयो । उपभोक्ता अधिकारकर्मी प्रेमलाल महर्जनले उपभोक्ता ऐन, २०७५ ले उपभोक्ता अधिकारकर्मीलाई नचिनेको गुनासो गर्नुभयो । “उपभोक्ता ऐनले वाणिज्य विभागलाई मात्र चिन्छ । बजार अनुगमन र कारवाहीको जिम्मेवारी विभागका निरीक्षण अधिकारीलाई दिएको छ । सुशासनको प्रत्याभूति दिने प्रमुख जिल्ला अधिकारीले अधिकार प्रयोग गर्न पाएका छैनन्”, उहाँले भन्नुभयो । (प्रशिक्षार्थी पत्रकार शर्मिला विक र अस्मिता सापकोटा)
हामीलाई तपाईंहरूको सल्लाह र सुझाव दिनुहोला जसले गर्दा हामीले यो विकास पत्रकारिता, लेखन र साहित्यको क्षेत्रमा अझ राम्रो गर्न सकौं । यहाँहरूका लेख तथा रचनाहरु छन् भने पनि हामीलाई पठाउनुहोला । छापिन योग्य रचनाहरू हामी छाप्ने छौं ।सम्पर्क इमेल : sendyourarticle@samayasamachar.com
तपाईको प्रतिक्रिया दिनुहोस