राष्ट्रिय फुटबल : मुख्य प्रशिक्षकमा कुवेतका अब्दुल्लाह अलमुताइरी नियुक्त

२२ चैत्र २०७७, आईतवार १६:४६

काठमाण्डौ । कुवेतका अब्दुल्लाह अलमुताइरीलाई नेपाली राष्ट्रिय फुटबल टोलीका मुख्य प्रशिक्षकको रुपमा नियुक्त गरिएको छ ।
अखिल नेपाल फुटबल सङ्घ एन्फाले आइतबार एक कार्यक्रमको आयोजना गरेर अलमुताइरीलाई मुख्य प्रशिक्षकको जिम्मेवारी दिएको घोषणा गरेको हो ।

आइतबार नियुक्ति पाएका ४० वर्षीय अलमुताइरीले कम्तीमा एक वर्षका लागि नेपाली टोलीलाई हेर्नेछन् । यस अवधिमा उनले कम्तीमा विश्वकप छनोट र साफ च्याम्पियनशिपमा नेपाली टोलीको नेतृत्व लिनेछन् ।

अन्तर्राष्ट्रिय फुटबल महासङ्घ (फिफा) र एसियाली फुटबल महासङ्घ (एएफसी) ले राष्ट्रिय टोलीका प्रशिक्षक हुन प्रो–लाइसेन्स अनिवार्य गरेपछि अलमुताइरीको नेपाली फुटबलमा प्रवेश भएको हो । नेपाल आएका अलमुताइरीले नेपाली फुटबललाई दक्षिण एसियामा बलियो बनाउन आफूले सक्दो मेहनत गर्ने बताए ।

काठमाण्डौमा सम्पन्न त्रिदेशीय फुटबल कपमा नेपाललाई उपाधि दिलाएका प्रशिक्षक बालगोपाल महर्जनलाई प्रतिस्थापन गर्दै एन्फाले अलमुताइरीलाई नेपाली राष्ट्रिय फुटबल टोलीका मुख्य प्रशिक्षकको रूपमा नियुक्त गरेको हो ।
नेपालले त्रिदेशीय कपमा उचालेको उपाधिले नेपाली समर्थकलाई धेरै खुसी दिएजस्तै आउँदा दिनमा नेपाली समर्थकलाई खुसी दिलाउन मेहनत गर्ने नवनियुक्त प्रशिक्षक अलमुताइरीले बताए ।

त्रिदेशीय कपको उपाधि जिताएका प्रशिक्षक बालगोपाल महर्जनलाई एन्फाले प्रो–लाइसेन्सका लागि कतार पठाउने निर्णय गरेको प्रवक्ता किरण राईले जानकारी दिए ।  

Leave a Reply

This site uses Akismet to reduce spam. Learn how your comment data is processed.