बृहत् लुम्बिनी गुरुयोजनाका बाँकी काम तत्काल अघि बढाऔँ : पूर्वअर्थमन्त्री पौडेल


नेकपा (एमाले)का उपाध्यक्ष तथा पूर्वअर्थमन्त्री विष्णुप्रसाद पौडेलले बृहत् लुम्बिनी गुरुयोजनाको कार्यान्वयनले देशको समृद्धि र अर्थतन्त्रमा योगदान दिनसक्ने भन्दै यसका बाँकी काम तीव्ररूपमा अघि बढाउन नेपाल सरकार र सरोकार रहेका व्यक्तिहरूको ध्यानाकर्षण गराउनुभएको छ ।

लुम्बिनी बौद्ध विश्वविद्यालयको १७औँ स्थापना दिवसका क्रममा यहाँ आउनुभएका उहाँले धार्मिक र पर्यटकीय हिसाबले विश्वकै आकर्षक गन्तव्यका रूपमा विकास भइरहेको लुम्बिनीको थप विकासका लागि बृहत गुरुयोजनाको कार्यान्वयन आवश्यक रहेको सुझाव दिनुभयो ।

उहाँले भन्नुभयो, “दुनियाँमा मानिसले ठूला चमत्कार गर्न सक्लान् तर बुद्धको जन्मभूमि कसैले सिर्जना गर्न सक्दैन । धार्मिक र पर्यटकीय हिसाबले लुम्बिनी विश्वकै आकर्षक गन्तव्यमात्र होइन कि विश्वको झण्डै एकतिहाइ जनसङ्ख्याकै आस्थाको केन्द्र हो, त्यसैले यसको विकासमा राज्यको ध्यान पुग्नु नितान्त जरुरी छ ।”

केन्जो टांगेले ४० वर्षअघि बनाएको लुम्बिनी गुरुयोजना अझै पूरा नहुनु बिडम्बना भएको बताउँदै यसको शीघ्र कार्यान्वयन आवश्यक रहेकामा उहाँले जोड दिनुभयो । पूर्वमन्त्री पौडेलले गुरुयोजनाको कार्यान्वयनले मात्रै लुम्बिनी आकर्षक पर्यटकीय गन्तव्यका रूपमा स्थापित हुने बताउनुभयो ।

लुम्बिनी गुरुयोजनाका बाँकी काम तीन वर्षभित्र सम्पन्न गर्नका लागि आफू अर्थमन्त्री भएका बेला रु सात अर्ब ३३ करोड बजेट विनियोजन गरी बहुवर्षीय स्रोत सुनिश्चितता गरेको जनाउँदै यसको सही सदुपयोग गर्न र आयोजनाको पूर्णतामा ढिला नगर्न पनि उहाँले सरकारसँग आग्रह गर्नुभयो ।

पूर्वमन्त्री पौडेलले गौतमबुद्धले २९ वर्ष बिताएको तिलौराकोट, बुद्धका अस्तु धातु राखिएको ठाउँ रामग्रामलगायतका बुद्धसँग जोडिएका स्थलहरूलाई समेटेर बृहत् लुम्बिनी गुरुयोजना निर्माण गरी प्रभावकारी कार्यान्वयन गर्न आवश्यक रहेको बताउनुभयो ।

लुम्बिनी बौद्ध विश्वविद्यालयलाई बहुविषयक विश्वविद्यालयमा स्तरोन्नति गर्न केन्द्रीय क्याम्पसको संरचना विकास र विस्तारका लागि गौतमबुद्धको मावलीस्थल देवदहमा ९२ बिघा जग्गा अधिग्रहण गर्ने निर्णय अघिल्लो सरकारले गरिसकेको जनाउँदै गुणस्तरीय शिक्षा सुनिश्चित गर्ने विश्वविद्यालयका रूपमा यस विश्वविद्यालाई स्थापित गर्नुपर्ने उहाँको सुझाव थियो ।

उहाँले भन्नुभयो, “यो विश्वविद्यालयलाई अगाडि बढाउन जुन तत्परता लिइएको छ त्यसलाई नयाँ ढङ्गबाट उचाइमा पु¥याउनुपर्छ, यो यात्रा अवरोध नहोस् भन्नका लागि सरकारले तदारुकता लिनुपर्दछ, यसका लागि आवश्यक बजेटको प्रबन्ध होस् ।”

पूर्वअर्थमन्त्री पौडेलले गौतमबुद्ध अन्तर्राष्ट्रिय विमानस्थललाई सुरुका दिनमा क्षेत्रीयस्तरको विमानस्थलका रूपमा डिजाइन गरिए पनि आवश्यकता महसुस गरी पूर्ण क्षमतामा सञ्चालनका लागि थप जग्गा अधिग्रहण गरिएको जानकारी दिँदै विमानस्थलको दोस्रो चरणको डिपिआरको काम अघि बढाउन पनि आग्रह गर्नुभयो । उहाँले विमानस्थलको उद्घाटन हुँदा दोस्रो चरणको कामको शिलान्यास गर्न सक्ने गरी काम अघि बढाउनुपर्नेमा पनि जोड दिनुभयो ।


Please send us your feedback or any articles if your passion is in writing and you want to publish your ideas/thoughts/stories . Our email address is sendyourarticle@samayasamachar.com. If we find your articles publishable, we will publish them. It can be any opinionated articles, or stories, or poems, or book reviews.
हामीलाई तपाईंहरूको सल्लाह र सुझाव दिनुहोला जसले गर्दा हामीले यो विकास पत्रकारिता, लेखन र साहित्यको क्षेत्रमा अझ राम्रो गर्न सकौं । यहाँहरूका लेख तथा रचनाहरु छन् भने पनि हामीलाई पठाउनुहोला । छापिन योग्य रचनाहरू हामी छाप्ने छौं ।सम्पर्क इमेल : sendyourarticle@samayasamachar.com

तपाईको प्रतिक्रिया दिनुहोस

सुन चाँदी दर अपडेट

© Gold & Silver Rates Nepal
विदेशी विनिमय दर अपडेट

© Forex Nepal
प्रीतिबाट युनिकोड

© Preeti to Unicode
रोमनाइज्ड नेपाली

© Nepali Unicode
आजको राशिफल

© Nepali horoscope