खेतीपाती भित्र्याउनमा सहयोग गर्दै उम्मेदवार


जिल्लामा घरदैलो अभियानलाई यहाँका विभिन्न पार्टीका उम्मेदवारहरुले तीव्र पार्न थालेका छन् । मतदान गर्ने दिन अर्थात् वैशाख ३० गते नजिकिँदै गर्दा यहाँका दलहरु अहिले स्थानीयवासीका घर घर तथा खेतबारीमै गएर आफ्ना लागि मत माग्न थालेका छन् । स्थानीयवासी गहुँ काट्न तथा धानको बेर्ना छर्नका लागि खेतमा बेस्त भए पनि उम्मेदवारहरु खेतमै गएर गहुँ काटीदिने तथा धानको बेर्ना छर्न सहयोग गर्ने र मत माग्ने गरेको दिपायल सिलगढी नगरपालिका–८ का स्थानीयवासी दलबहादुर साउदले बताउनुभयो ।

उहाँले भन्नुभयो, “उम्मेदवारहरु खेतमै आएर मत माग्न थालेका छन्, हामी खेती किसानीमै बेस्त छौँ, हाम्रा खेतीपाती बटुल्ने काममा पनि सहयोग गर्न थालेका छन् ।” उम्मेदवारहरुले किसानलाई खेतीपाती बटुल्नेलगायतका काममा सहयोग गर्न थालेपछि अहिले किसानका काममा निकै सहज हुँदै गएको स्थानीयवासीहरु बताउँछन् । उम्मेदवारहरुसँगै उनीहरुका कार्यकर्ताहरुले पनि किसानका कामहरुमा सहयोग गर्दै आइरहेको बताइएको छ । जिल्लामा नेपाली कांग्रेस, नेकपा (एमाले), नेकपा (माओवादी केन्द्र), नेकपा (एकीकृत समाजवादी), राप्रपा, राष्ट्रिय जनमोर्चालगायतका दलका नेताहरुले आफ्ना चुनावी अभियानलाई तीव्रता दिएका छन् ।

आसन्न निर्वाचनमा नेकपा (माओवादी केन्द्र) तथा नेकपा (एकीकृत समाजवादी)बीच जिल्लामा ताल मेल भई अहिलेसँगै घरदैलो अभियानमा जुटेका छन् भने कांग्रेस र एमाले भने अलग अलग भएर चुनावी अभियान लिएर हिँडिरहेका छन् । प्राय सबै राजनीतिक दलका नेताहरुका पर्चा पम्पलेटहरुले यहाँका सार्वजनिक स्थानहरु भरिभराउ भएका छन् । यसैगरी उम्मेदवारहरुले आफ्ना प्रचार सामग्रीहरु यहाँका विद्युत्का पोल, सार्वजनिक स्थल तथा सडकहरुमा टाँसेका छन् ।

घरदैलो अभियान लिएर घरघर तथा स्थानीयका खेतबारीमा आइरहेका नेताहरुलाई यहाँका नागरिकले शिक्षा, स्वास्थ्य, विद्युत् तथा सडकको विकास गर्नेलाई आफ्नो मत दिने माग राखेको जोरायल गाउँपालिका–४ नकु गाउँका स्थानीयवासी सोपानसिंह बोहराले बताउनुभयो । उहाँले भन्नुभयो, “हामीलाई आवश्यक पर्ने शिक्षा, सडक र स्वास्थ्य अफिस दिनेलाई हामी भोट दिन्छौँ, हाम्रा खेतमा अहिले आएर काम गरेर मात्रै भोट दिने छैनौँ ।” यसपटक स्थानीय तहमा नयाँ अनुहारसहित युवाहरु बढी उम्मेदवार भएकाले युवाले विकास गर्न सक्नेमा यहाँका स्थानीयहरु आशावादी बनेका छन् । गाउँमा चुनावी अभियान तीव्र भएसँगै कामका लागि जिल्ला बाहिर तथा छिमेकी मुलुक भारत गएका यहाँका सयौँ नागरिक अहिले गाउँ फर्किएका छन् ।

दुई नगरपालिका तथा सात गाउँपालिकासहित नौ स्थानीय तह छन् । प्रमुख निर्वाचन अधिकृत विदुर काफ्लेले नौ स्थानीय तहका ३४३ पदका लागि एक हजार ६९ जनाको उम्मेदवारी दर्ता भएको छ । ती मध्ये दिपायल सिलगढी नगरपालिकाको प्रमुखका लागि मात्रै सात जनाको उम्मेदवारी परेको छ भने उपप्रमुखका लागि चार जनाले उम्मेदवारी दर्ता गराएका छन् ।

उक्त नगरपालिकाको नौ वटा वडाध्यक्षका लागि ३७ जनाको उम्मेदवारी परेको छ भने खुल्ला सदस्यमा ५६, महिला सदस्यमा २७ तथा दलित महिला सदस्यमा २८ जनाको उम्मेदवारी परेको छ । यसैगरी शिखर नगरपालिकाको प्रमुखमा पाँच र उपप्रमुखमा तीन जनाको उम्मेदवारी परेको छ । शिखरमा ५७ पदमा १४८ जनाको उम्मेदवारी परेको छ ।

मुख्य निर्वाचन अधिकृतको कार्यालयका अनुसार पूर्वीचौकी गाउँपालिकामा ३७ पदका लागि ११६ जनाको उम्मेदवारी परेको छ । सायल गाउँपालिकामा ३२ पदका लागि ९६ जनाले उम्मेदवारी दर्ता गराएका छन् । आदर्श गाउँपालिकामा ३७ पदका लागि १२० जनाले उम्मेदवारी दर्ता गराएका छन् ।

यसैगरी केआइसिंह गाउँपालिकामा ३७ पदका लागि ११८, बोगटान फुडिसल गाउँपालिकामा ३७ पदका लागि ११५ ,बडीकेदार गाउँपालिकामा २७ पदका लागि ८२ र जोरायल गाउँपालिकामा ३२ पदको लागि ११५ जनाले उम्मेदवारी दर्ता गराएको निर्वाचन अधिकृतको कार्यालयले जनाएका छन् ।


Please send us your feedback or any articles if your passion is in writing and you want to publish your ideas/thoughts/stories . Our email address is sendyourarticle@samayasamachar.com. If we find your articles publishable, we will publish them. It can be any opinionated articles, or stories, or poems, or book reviews.
हामीलाई तपाईंहरूको सल्लाह र सुझाव दिनुहोला जसले गर्दा हामीले यो विकास पत्रकारिता, लेखन र साहित्यको क्षेत्रमा अझ राम्रो गर्न सकौं । यहाँहरूका लेख तथा रचनाहरु छन् भने पनि हामीलाई पठाउनुहोला । छापिन योग्य रचनाहरू हामी छाप्ने छौं ।सम्पर्क इमेल : sendyourarticle@samayasamachar.com

तपाईको प्रतिक्रिया दिनुहोस

सुन चाँदी दर अपडेट

© Gold & Silver Rates Nepal
विदेशी विनिमय दर अपडेट

© Forex Nepal
प्रीतिबाट युनिकोड

© Preeti to Unicode
रोमनाइज्ड नेपाली

© Nepali Unicode
आजको राशिफल

© Nepali horoscope