तीन प्रस्तावित राजदूतविरुद्ध पाँच उजुरी

काठमाडौं, भदौ २५ । पाकिस्तान, जर्मनी र युरोपियन युनियनका लागि नेपाली राजदूतमा सिफारिस भएका तीन जनाको बिहीबारदेखि संसदीय सुनुवाइ सुरु भएको छ ।

सरकारले बेल्जियम र युरोपियन युनियनका लागि गेहेन्द्र राजभण्डारी, पाकिस्तानका लागि तापस अधिकारी र जर्मनीका लागि रामकाजी खड्कालाई सिफारिस गरेको थियो । उनीहरुविरुद्ध पाँच वटा उजुरी परेका छन् ।

समिति सचिवालयका अनुसार एउटा उजुरी बेल्जियमका लागि सिफारिस भएका राजभण्डारीवरुद्ध छ भने ४ वटा उजुरी किटानीविनाका छन ।

अन्य उजुरीहरुमा सिफारिस समावेशी र समानुपातिक नभएको दाबी गरिएको छ। राजदूत सिफारिस गर्दा संविधानको भावना र मर्म अनुसार नभएको दाबी उजुरीमा गरिएको छ ।

महिला, दलित, आदिवासीलगायत अन्यको प्रतिनिधित्व नभएको दावी उजुरीमा गरिएको छ ।
सरकारले राजदूतका लागि सिफारिस गरेपछि सुनुवाइ समितिले भदौ १२ गते उजुरी आह्वान गरेको थियो ।