अफगानिस्तानमा पाकिस्तानी भिसा लिने लाइनमा भागदौड हुदाँ ११ महिलासहित कम्तीमा १५ जनाको मृत्यु

६ कार्तिक २०७७, बिहीबार ०६:४५

एजेन्सी, कात्तिक ६ । अफगानिस्तानको जलालावादस्थित पाकिस्तानी कन्सुलरको कार्यालय नजिकै बुधबार भएको भागदौडमा परी कम्तीमा १५ जनाको ज्यान गएको छ ।

जलालावादस्थित रंगशालामा पाकिस्तानको भिसाका लागि जम्मा भएका बेला अफगानहरुबीच भागदौड मच्चिँदा ११ महिलासहित १५ जनाको मृत्यु भएको हो । मृत्यु हुने अन्यमा ज्येष्ठ नागरिक रहेको बताइएको छ । नान्गाहार प्रान्तको एक अस्पतालका प्रवक्ताले भिसाका लागि भेला भएका करिब तीन हजार मानिस रंगशालाबाट बाहिरिने क्रममा उक्त हिंसा भएको जानकारी दिएका छन् ।

पाकिस्तान सरकारले सात महिनापछि भिसा दिन सुरु गरेपछि उनीहरु त्यहाँ भेला भएका थिए । यसैबीच पाकिस्तानको कराचीमा विष्फोट हुँदा कम्तीमा पाँचजनाको मृत्यु भएको छ भने २० जना घाइते भएका छन् ।

पाकिस्तानको दक्षिणी शहर कराचीको विष्फोट स्थलमा खटिएका एक अधिकारीले अल जजिरासँग आवासीय भवनमा भएको विष्फोटमा उनीहरु मारिएको जानकारी दिएका हुन् । कराची विश्वविद्यालय नजिकै भएको सो विष्फोटको कारण भने प्रष्ट भइनसकेको प्रहरीले बताएको छ ।

पाकिस्तानको सबैभन्दा ठूलो शहर कराचीमा यसअघि पनि यस्तै प्रकारका राजनीतिक, जातीय तथा अन्य प्रकारका हिंसा हुने गरेको पाइन्छ । यद्दपि, यो संख्या पछिल्ला वर्षहरुमा घट्दै गएको छ ।

Leave a Reply

This site uses Akismet to reduce spam. Learn how your comment data is processed.