थाहा थिएन तिम्रो स्पर्शले अनेक तरङ्ग ल्याइदिन्छ

थाहा थिएन तिम्रो स्पर्शले अनेक तरङ्ग ल्याइदिन्छ
अलि अलि गर्दै मदहोशीमा खै के के गराइदिन्छ ।

साँच्चै हो, यो थाहा पाएपछि मैले पिउनै छाडिदिएँ
क्या नशा छ ओठमा, एकै चुम्बनले बेहोस बनाइदिन्छ ।

भो अब उज्यालो कहिल्यै नहोस्झैँ हुन्छ अचानक
जब तिम्रो साथले अचम्मसँग रातभरि ढलाइदिन्छ ।

कति पटक उकाली ओराली गरियो, कहिल्यै थाकिएन
बरू तिमीसँगको एकान्तले हरेकचोटि गलाइदिन्छ ।

पहिलोचोटि यस्तै यस्तै हुन्छ, सम्झाउँछ मेरो साथी
नहेर्नु आँखामा केही दिन, उनको तन मन लजाइदिन्छ ।

गजल लेखनमा दत्तचित्त दाङका आदर्श खत्री कलाप्रेमी सर्जक हुन् । हाल सिड्नीमा रहेका उनले पठन संस्कृतिलाई उन्नत बनाउन ‘नेपाली एक्पर्ट बुक रिभ्यू’ पोर्टल शुरू गरेका छन् ।